လေးစားမှု ဟူသည် အဘယ်နည်း ?
သူတစ်ပါးကို လေးစားခြင်းသည် ကောင်းမြတ်၏
မိမိကိုယ်ကို လေးစားခြင်းသည် ပို၍ ကောင်းမြတ်၏
ထို့အတူ
သူတစ်ပါးအား လေးစားတတ်ရန်မှာ ခက်ခဲ၏
မိမိကိုယ်ကို လေးစားတတ်ရန်မှာ ပို၍ ခက်ခဲ၏
အနှစ်ချုပ်လိုက်သော်
မိမိကိုယ်ကို လေးစားတတ်သူသည် သူတစ်ပါးအား လေးစားတတ်၏"
အိမ်ဝေးသူ (KZ)
ကမ္ဘာကျော်အောက်စဖို့ဒ် (Oxford) အဘိဓာန်ကြီးက "လေးစားမှု ဟူသည်မှာ တစ်စုံတစ်ဦး၊
သို့ မဟုတ် တစ်စုံတရာ၏ စွမ်းပကား၊ အရည်အချင်း၊ အောင်မြင်ဖြစ်ထွန်းမှု အစရှိသည်တို့အား
ရင်ထဲမှ လှိုက်လှိုက်လှဲလှဲ လေးစားအားကျ အတုယူခံစားတတ်ခြင်း"ဟု အဓိပ္ပါယ် ဖွင့်ဆိုထားပေသည်။
လေးစားမှုဟူသည့် ဝေါဟာရ နောက်တွင် ကပ်လျက် လိုက်ပါမည်မှာ ဘာကြောင့် ( Why ) ဖြစ်ပေသည်။
ဥပမာအားဖြင့်...
ဦးမှန်ကန် ဆိုသော တရားသူကြီးတစ်ဦးသည် သူ့အလုပ်သဘောအရ အခ ကြေးငွေ ယူပြီး
တရားစီရင်မှုများ လုပ်ဆောင်သည်ဆိုပါက ဤကိစ္စသည် သာမန်သာ ဖြစ်သည်။ သို့သော်
ဦးမှန်ကန်သည် အခကြေးငွေကို ( ယူသင့်သလောက်သာယူပြီး ) တရားစီရင်မှုများကိုလည်း
( သမာသမတ်ကျစွာ) လုပ်ဆောင်သည်ဟု ဆိုပါက ကျွန်တော် သူ့ကို အထိုက်အလျောက်
လေးစားမည်ဖြစ်သည်။ထိုမှတဆင့် သူသည် ဆင်းရဲနိမ့်ပါးသူများ၊ မတရား ညှင်းပန်းနှိပ်စက်ခံရသူများ
အစရှိသူတို့ကို ( အခကြေးငွေ အဓိကမထားဘဲ) တရားမျှတမှု အတွက် ဆောင်ရွက်ပေးသည်ဆိုပါက
ကျွန်တော့်လေးစားမှု တစ်ဆင့်တိုးပေလိမ့်ဦးမည်။ အကယ်၍သာ ထိုဦးမှန်ကန်သည်
သမာသမတ်လည်းကျသည်၊ လူတစ်ဖက်သားကို ငွေအဓိက မထားဘဲ ကူညီသည်။ ထိုမျှမက သူသည်
အသက်အရွယ်ကြီးရင့်ပြီး အိုမင်းမစွမ်းဖြစ်နေသော မိခင်အား လုပ်ကျွေးနေသော သားလိမ္မာတစ်ဦး
ဖြစ်နေပါက ကျွန်တော့် လေးစားမှုက ဆိုဖွယ်ရာ မရှိတော့။ ဤအကြောင်းအရာမှာ ကျွန်တော်
ဥာဏ်မှီသလောက် အရိုးရှင်းဆုံး ဥပမာလေး တစ်ခု ထုတ်ပြခြင်းဖြစ်သည်။ ဆိုခဲ့သည့်အတိုင်း
လေးစားမှုတိုင်းမှာ အကြောင်းပြချက် တစ်ခု အမြဲ လိုက်ပါတတ်ပေသည်။
အကြောင်းမဲ့ လေးစားခြင်းတော့ မရှိတန်ပါ။
ထိုမျှမက လူတို့ သည် သူတို့ ဖြတ်သန်းခဲ့သည့် ဘဝအတွေ့ အကြုံကို အခြေခံ၍လည်း
( မှားယွင်းစွာ လေးစား ) တတ်ကြပြန်သည်။ ဥပမာ ငွေကို ချို့ တဲ့စွာ သုံးစွဲခဲ့ရသူ တစ်ဦးသည်
ငွေကြေး ချမ်းသာသူ တစ်ဦးနှင့် ကြုံရသောအခါ (ငွေကြေးတစ်ခုတည်းကို အခြေခံပြီး) ပုံပြီး
လေးစားလိုက်ခြင်းမျိုးဖြစ်သည်။ ကျောင်းပညာကို လုံးဝ မသင်ခဲ့ရသူတစ်ဦးသည်
(လက်တွေ့လိုက်နာခြင်း မရှိသူ(ဝါ) ပညာရှိမဟုတ်သော ပညာသိသက်သက် ) လူအများ အမြင်
ပညာတတ်ကြီး တစ်ဦးနှင့် မိတ်ဆွေ ဖြစ်သော အခါ၌ အလွန်တရာ အထင်ကြီးခြင်းမျိုး ဖြစ်သည်။
အလွန်ချမ်းသာ ကြွယ်ဝသော သူဋ္ဌေးကြီးတစ်ဦးအနေနှင့်လည်း လက်လုပ်လက်စား လူငယ်တစ်ဦးကို
လေးစားသင့်သည်။ (ငွေကြေးကြောင့် လေးစားမှု မပျောက်ရှသင့်)။
နိုင်ငံတော် အကြီးအကဲ တစ်ဦးအနေနှင့်လည်း လက်အောက်ငယ်သား စာရေးတစ်ဦးကို
လေးစားသင့်သည်။ (ရာထူးကြောင့် လေးစားမှု မပျောက်ရှသင့်)။
ထိုနည်းတူစွာ အသက်အရွယ် ကွာခြားမှုများကြောင့်၊ အဆင့်အတန်း မတူမှုများကြောင့်လည်း
လေးစားမှု မပျောက်ရှသင့်ပေ။
နားလည်မှုဟူသော ဝေါဟာရ တွင် အပြန်အလှန်၏ အရေးပါပုံကို ကျွန်တော် ပြောခဲ့ဖူးသည်။
လေးစားမှုဟူသည်မှာလည်း ဤသဘောတရား အတိုင်းသာ ဖြစ်သည်။ အခြားသူကို လေးစားမှု
(ပေးရမည်၊ပြရမည်) ဖြစ်ပြီး အပြန်အလှန်အားဖြင့် အခြားသူထံမှ ထိုက်သင့်သော လေးစားမှုကိုလည်း
မိမိက (လက်ခံရရှိမည်) ဖြစ်သည်။ ယခုအခါ လေးစားမှုကို နှစ်လမ်းသွားမှန်း သိသူနည်းပါး
လာခဲ့ပြီဖြစ်သည်။ တစ်လမ်းသွားလမ်းကဲ့သို့ သဘောထား၍ မိမိကိုသာ တစ်လောကလုံးက
ဦးညွတ်စေချင်ကြသည်၊ အသားလွတ် လေးစားစေချင်ကြသည်။ လူတစ်ဖက်သားက
မိမိကိုလေးစားစေချင်ပါက မိမိအနေနှင့် ကောင်းမွန်သော စိတ်ဓာတ်အခြေခံဖြင့် တစ်ဖြည်းဖြည်း
ကြိုးစားတည်ဆောက်ယူရမည်ဖြစ်သည်။
ယခုအခါ ကျွန်တော်တို့ ပတ်ဝန်းကျင်မှာ ဟန်ဆောင်လေးစားမှုဟူသော ယဉ်ကျေးမှု အသစ်ကြီးတစ်ခု
ကျယ်ကျယ်ပြန့်ပြန့် ထွန်းကားလျက်ရှိသည်။ ငွေကြေးချမ်းသာသူ၊ ပညာတတ်သူ၊ ဂုဏ်ကြီးမြတ်သူ၊
အာဏာရှိသူ အစရှိသဖြင့် အထိုထိုသော လူအမျိုးအမျိုးတို့အား ဟန်ဆောင်လေးစားပြပြီး
အရူးဘုံမြှောက်သကဲ့သို့ သာပေါင်းညာစားနေသော လူ့ကပ်ပါးများ အများအပြား
ပေါ်ပေါက်လျက် ရှိချေသည်။ ထိုသူများအနေဖြင့် သတိထားရမည်မှာ တစ်စုံတစ်ဦးက
သင့်အား အလွန်အမင်း လေးစားနေပြီဆိုပါက ထိုသူ လေးစားသည့်အတိုင်း မိမိမှာ
အရည်အချင်း တကယ်ရှိနေသလား၊ မိမိနှင့် ကိုက်ညီနေပါသလား
ဆိုတာကို ပထမဦးစွာ သုံးသပ် သင့်ပေသည်။ ထိုသို့ မဟုတ်ခဲ့ပါက သင့်အနေနှင့် သတိထားဖို့ 
လိုနေပြီဖြစ်သည်။
ဤလောက၌ သူတစ်ပါးကို ဟန်ဆောင်၍ဖြစ်စေ၊ အမှန်တကယ်ဖြစ်စေ လေးစားပြရသည်မှာ
လွယ်ကူလွန်းပါသည်။ သို့သော် မိမိကိုယ်ကို တကယ်လေးစားဖို့ဝေးစွ၊ ဟန်ဆောင်လေးစားရမည်ကိုမူ
လူအများတို့ ကြောက်ရွံ့ကြသည်။ မိမိကိုယ်ကို လေးစားတတ်ခြင်းသည် သူတစ်ပါးကို
လေးစားတတ်ခြင်းထက် သာမြတ်သည်ဟု ကျွန်တော် ယူဆမိသည်။
နိဂုံးချုပ်အနေဖြင့် အကြံပေးလိုသည်မှာ (မှားလျှင်ပယ်ပါ)
- ပထမအဆင့် အနေဖြင့် မိမိကိုယ်ကျင့်တရားကို အခြေအနေတစ်ခု အထိရောက်အောင်
တည်ဆောက်ယူပါ။
- ပြီးလျှင် မိမိကိုယ်ကျင့်တရားကို အခြေခံပြီး မိမိကိုယ်ကို ဟန်ဆောင်လေးစားကြည့်ပါ။
- အဆင်ပြေပြီဆိုလျှင် မိမိကိုယ်ကို တကယ်လေးစားစွာ၊ ဆက်ဆံပါ။
- မိမိကိုယ်ကိုမိမိ လေးစားတတ်လာပြီဆိုလျှင် သူတစ်ပါးကို တကယ့်
လှိုက်လှိုက်လှဲလှဲလေးစားတတ်လာပါလိမ့်မည်။
- သူတစ်ပါး၏ လေးစားစရာ အချက်အလက်များကို အလွယ်တကူ မြင်တတ်လာပါလိမ့်မည်။
- အပြန်အလှန်လေးစားမှုတို့ တည်မြဲလာပါက သက်ရှိအချင်းချင်း ကူးလူးဆက်ဆံရာ၌
ယုံကြည်မှုတို့ တိုးပွားပေလိမ့်မည်။
အိမ်ဝေးသူ (KZ)
---------------------------------------------------------------------------------
မှတ်ချက်။
ပြည့်စုံမှု အားနည်းလှသေးသော ဤ ပို့စ်ပါ အကြောင်းအရာအား မတူညီသော အမြင်များ၊
အယူအဆများဖြင့် ဝိုင်းဝန်း ဖြည့်စွက်ပေးကြမည်ဆိုပါက အတိုင်းမသိ ဝမ်းမြောက်မိမည်
ဖြစ်ပါကြောင်း။
No comments:
Post a Comment