ဘောင်တစ်ခု၊ စည်းတစ်ခုသည် ၀န်းကျင်၊အနေအထား၊ အဖွဲ့အစည်း အသိုင်းအ၀န်းတစ်ခုကို အကာအကွယ်ဖြစ်စေနိုင်သလို
အထိန်းအကွပ်လည်း ဖြစ်စေနိုင်ပါသည်။ ဘောင်ထဲကမထွက်နဲ့ ၊ ဘောင်မကျော်နဲ၊ စည်းလွတ်ဝါးလွတ်ဖြစ်နေတယ် ဆိုတဲ့
စကားစုများစွာကို နေ့စဉ်ပုံမှန်ကြားသိနေရသည်။ ပန်းချီကားတစ်ချပ်၏ တန်ဖိုးကို ဘောင်ကွပ်၍တန်ဖိုးတက်စေသလို၊
အကွပ်မရှိတဲ့ ဖျာတစ်ချပ်၊ ကြမ်းတစ်ချပ်သည်လည်း ပရမ်းပတာဖြစ်နိုင်စေသည်။ ပတ်ဝန်းကျင်
လူမှု့အသိုင်းအ၀န်းတွင်လည်း စည်းဘောင်ကျော်လွန်ပါက လူမှုရေးဖောက်ပြန်မှုများ ဖြစ်လာသည်။
အိမ်စည်းကမ်း၊ ကျောင်းစည်းကမ်း၊ ပတ်ဝန်းကျင်စည်းကမ်း၊ အုပ်ချုပ်မှုစည်းကမ်းဘောင်များကို
ကျွန်ုပ်တို့ သိရှိလိုက်နာကြရသည်။
ထို့အတူ ဘာသာတရားပေါင်းစုံ၏ ကိုးကွယ်ယုံကြည်ရာ ၀တ်ပြုဆောင်၊ ဘုရား၊ ဗလီ၊ ကျောင်းကန်များတွင်လည်း
၎င်းစည်းဘောင်များကို လိုက်နာဆောင်ရွက်ကြရသည်။ ယနေ့ မြန်မာနိုင်ငံတွင် ဖြစ်ပွားခဲ့သော လူမျိုးတုံးသတ်ဖြတ်မှု၊
ဥပဒေမဲ့ လူနည်းစုများ စော်ကားအကြမ်းဖက်မှုများ ဖြစ်ပွားပြီး၊ ဖြစ်ပွားနေဆဲကာလများတွင် ချစ်ကြည်ညီညွတ်ရေးဟု
ခေါင်းစဉ်တပ်ကာ၊ ဗလီဝတ်ကျောင်းများသို့ အလည်အပတ်၊ ၀င်ရောက်လေ့လာခြင်းများ ၊
ဖိတ်ခေါ်ခြင်းများဆောင်ရွက်နေကြခြင်းသည် အပေါင်းလက္ခဏာဆောင်သောလုပ်ရပ်
ဟုသုံးသပ်နိုင်သော်လည်း နောက်ဆက်တွဲအကျိုးဆက်များကိုလည်း တွေးပူထားသင့်သည်။
"လူတစ်စု၏ စော်ကားမှု၊ အခြေမြစ်မရှိ စွပ်စွဲပြောဆိုမှုများကို ရှင်းလင်းသည်ဆိုပါက မီဒီယာများ၊
အဖွဲ့အစည်းအသီးသီးက တာဝန်ရှိပုဂ္ဂိုလ်များကို ခေါ်ယူတွေ့ဆုံ ရှင်းလင်းပြသကာ မီဒီယာများမှ တဆင့်
လူအများသိရှိစေရန် လုပ်ဆောင်သင့်သည်။"
တစ်ဘက်ဆွဲ မီဒီယာများမှ ဖေါ်ပြခြင်း မပြုသည်ကို စိုးရိမ်ပါကလည်း အွန်လိုင်းမီဒီယာများမှ ဖေါ်ပြနိုင်သလို
စွပ်စွဲပြောဆိုနေသူများ ထင်သာမြင်သာရှိအောင် အခြားသောလုပ်ဆောင်နိုင်သော နည်းလမ်းများလည်း ရှိပါသေးသည်။
ဗလီဝတ်ကျောင်းတော်များသည် လူပေါင်းစုံ လည်ပတ်ရာ ဇရပ်၊ အပန်းဖြေပန်းခြံများ မဟုတ်ပေ။
ငြိမ်းချမ်းသော ၀တ်ပြုရာ နေရာများပင်ဖြစ်သည်။ အပြုသဘောဆောင် လေ့လာ၊ စူးစမ်းမှုကို အားပေးသင့်ပါသည်။
သို့သော် စည်းလွတ်ဘောင်လွတ် ဆောင်ရွက်နေခြင်းများ မှ ဆင့်ကဲဖြစ်စဉ်ပြဿနာများ ပေါ်ပေါက်လာနိုင်သည်ကိုလည်း
တွေးဆ ဆင်ခြင်ထားသင့်ပါသည်။ အနောက်နိုင်ငံများနှင့် ဥရောပနိုင်ငံများတွင်လည်း အစ္စလာမ်ဘာသာဝင်များ၏
ဗလီဝတ်ကျောင်းတော်များကို လေ့လာစူးစမ်းရာတွင် အခြေခံစည်းဘောင်များကို လေးစားလိုက်နာကာ
ရိုသေမှုဖြင့် စောင့်ထိန်းလေ့လာကြသည်။
အစ္စလာမ်သာသနာ၏ အခြေခံစည်းမျဉ်းများတွင် ဗလီဝတ်ကျောင်းတော်များသို့ ၀င်ရောက်တွင် ခန္ဓာကိုယ်
သန့်ရှင်းစင်ကြယ်မှု ရှိမှသာ ၀င်ရောက်ကြရသလို အမျိုးသမီးများကိုလည်း သတ်မှတ်ထားသော စည်းဘောင်များ
စောင့်ထိန်းပါက ၀င်ရောက်ခွင့်ရှိကြပါသည်။ ထို့ကြောင့်လည်း ဗလီဝတ်ကျောင်းတော်များတွင် သန့်စင်ဆောင်များ၊
ရေကန်များ ထားရှိခြင်းပင်ဖြစ်ပါသည်။ ကိုယ်၊လက်မျက်နှာ ဆေးကြောသန့်စင်စေပြီးမှသာလျှင် ၀တ်ပြုဆောင်သို့
ဝင်ရောက်ကြသည်ကို တွေ့ရမည်ဖြစ်သည်။ မြန်မာနိုင်ငံရှိ ဗလီဝတ်ကျောင်းများတွင် အမျိုးသမီးသီးသန့်ဆောင်ရှိသည့်
ဝတ်ကျောင်းများတွင် သီးသန့်ဆောင်များသို့ ၀င်ရောက်ကြရသည်။ အချို့နိုင်ငံများတွင် ပင်မဆောင်သို့ အမျိုးသမီးများ
ဝင်ရောက်ခွင့်ပေးသောဝတ်ပြုကျောင်းများ ရှိသော်လည်း ကန့်လန့်ကာကန့်ဖြင့် ကာရံထားသည်ကို တွေ့နိုင်သည်။
အမျိုးသမီးများကို ပင်မ၀တ်ပြုဆောင်၏ ရှေ့ဆုံးတန်း (ဗလီတိုင်း၏ ရှေ့ဆုံး အပိုင်းအ၀န်းလေး ) နေရာကို ၀င်ရောက်ခွင့် ၊
သွားလာခွင့် ကန့်သတ်ထားသည်။
ထိုကဲ့သို့ ကန့်သတ်ထားခြင်းသည် ဗုဒ္ဓဘာသာတွင် တန်ခိုးကြီးဘုရား၊ စေတီ၏ အမြင့်မြတ်ဆုံးနေရာများသို့ အမျိုးသမီးများ
သွားရောက်ခွင့်ကန့်သတ်ထားခြင်းနှင့် ဆင်တူပါသည်။ အစွန်းရောက်သော ခွဲခြားကန့်သတ်မှုမဟုတ်ပဲ အမျိုးသမီးများ၏
ခန္ဓာကိုယ်ဓမ္မတာဖြစ်စဉ်များနှင့် ကိုယ်မသန့်ရှင်းမှုများ ဖြစ်ပေါ်လာနိုင်၍ ကန့်သတ်ထားခြင်းပင်ဖြစ်ပါသည်။
အစွန်းနှစ်ဖက်ကို မရောက်လွန်းသော အလယ်လတ်လမ်းစဉ်ကို သွားရောက်ရောက်မည်ဆိုသော်လည်း
အချို့သော စည်းမျဉ်း၊ ဥပေဒများသည် လူသားတို့အမြင်ဖြင့် မမြင်သာသော်လည်း ရိုသေလေးမြတ်ရာ
ဘာသာတရားများ၏ စည်းကမ်းများကိုတော့ လေးစားလိုက်နာကြရမည်ဖြစ်သည်။
ယနေ့အခါ ဗလီဝတ်ကျောင်းများသို့ လေ့လာစူးစမ်းရာတွင် အပြုအမူလုပ်ရပ်တစ်ချို့သည် စည်းဘောင်အချို့ကို
ကျော်လွန်ကာ ပင်မ၀တ်ပြုဆောင်များသို့တိုင် အမျိုးသမီးများသွားလာခြင်း၊ ဗလီတွင်းကျွေးမွေးဧည့်ခံခြင်းများနှင့်
လိုက်လျောမှု လွန်ကဲခြင်းများသည် နောက်တစ်ချိန်တွင် ဆင့်ကဲဖြစ်စဉ်ပြဿနာများ ပေါ်ပေါက်လာမည်ကို
တွေးပူနေရသည်။ အစ္စလာမ်ဘာသာရေးခေါင်းဆောင်အချို့သည်လည်း အစိုးရ၏ လှည့်ကွက်၊
ကစားကွက်များကို သိရက်နဲ့  လည်းစင်းခံနေသည်လား၊ ကိုယ်တိုင်လှည့်ကွက်ထဲ
ရောက်မှန်းမသိရောက်နေသည်လားဆိုတာတော့ စဉ်းစားစရာပင်ဖြစ်သည်။ မည်သို့ပင်ဖြစ်စေကာမူ
အစ္စလာမ်သာသနာ၏ မြင့်မြတ်လှသောအရာများကိုတော့ ဖိအား၊ တွန်းအား၊ ကစားကွက်များ စတေးခံမသင့်ပေ။
မြန်မာနိုင်ငံရှိ အစ္စလာမ်ဘာသာကိုးကွယ်သောလူမျိုးများ၏ ဘ၀ပေါင်းများစွာ၊ အသက်ပေါင်းများစွာ၊ မျှော်လင့်ချက်နှင့်
ရည်မှန်းချက်၊ ပိုင်ဆိုင်မှုများစွာ ပေးဆပ်၊ စတေးခဲ့ရပြီးဖြစ်ပါသည်။ မြန်မာ့သမိုင်းတွင် အစ္စလာမ်ဘာသာကိုးကွယ်သူများမှ
ဘာသာမတူ တပါးသူများ၏ ဘုရား၊ကျောင်း၊ကန်များကို ဖျက်ဆီးယိုးယွင်းစေခဲ့သည့် သမိုင်းအမည်းစက်မရှိခဲ့ပေ။
အတူတကွပေးဆပ် ကြိုးစားခဲ့သည်များသာ ရှိသည်။ ခေတ်အဆက်ဆက် ချစ်ကြည်ရင်းနှီးခဲ့သူများသည်
အာဏာရှင်စနစ်အဆက်ဆက်၏ ဆိုးမွေများကြောင့်သာ နှစ်ပေါင်း၄၀ကျော် ၅၀ နီးပါး မှိုင်းသွင်း ၊ မှိုင်းတိုက်ခံရကာ
စိတ်ဓါတ်များ Grown Zero သို့ ကျဆင်း၊ နင်းချေခံရသည်ကို ၀ိုင်းဝန်းသတိပြုသင့်ကာ ညီညွတ်သင့်ပါပေသည်။
( အိမ်ဝေးသူ & မင်းထွဋ် )
No comments:
Post a Comment